RUS
SMARTNEWS.KZ басылымының хабарлауынша, Астанадағы инфекциялық орталықта жатқан жасөспірім пациенттің тамағынан құрт табылды. Оқыс жағдайды оның көрші төсектегі науқасы видеоға түсіріп, жариялаған.
Инфекциялық аурухананың бөлім меңгерушісі Ақбота Әбішбаева оқиғаны аса маңызды көрмей:
«Бұл – жай ғана бөтен зат. Үйде де тамақтан кейде тас немесе басқа нәрсе шығып қалуы мүмкін. Қайнатылған тағамда онша қауіптілік жоқ, тіпті жеп қойса да денсаулыққа зиян тигізбейді», – деп пікір білдірді.
Алайда аурухана директоры Зекен Исақов мұндай жайтқа күмәнмен қарайды.
«Құртты бірге қайнатқанда ол бұзылып кетер еді. Ал мынау бүтін күйінде шыққан. Бұл тіпті түсініксіз жағдай. Бізде асхана аутсорсингке берілген, тамақты Astana Construction – 2050 компаниясы әзірлейді», – деді ол.
Ас мәзірін дайындайтын мердігердің өкілдері өздеріне шаң жуытпай отыр. ЖШС директоры Ботагөз Әкімбекованың айтуынша, әр екі апта сайын жаңа жарма сатып алынады.
«Қайдан пайда болғанын түсінбей отырмыз. Бәлкім, біз алған қоймадағы тауардың ішінде болған шығар. Себебі қап жабық болады, ішіне сырттан ештеңе кірмейді», – деді ол.
Осы оқиғадан кейін аурухана мердігерге ресми шағым жолдады. Дегенмен келісімшартты бұзбайтыны белгілі болды. Компания кем дегенде жыл соңына дейін, тендер мерзімі біткенге дейін жұмысын жалғастырады.