RUS
SMARTNEWS.KZ басылымының хабарлауынша, Франция президенті Эммануэль Макрон БҰҰ Бас ассамблеясының сессиясында Палестина мемлекетін ресми түрде мойындағанын жариялады. Ол әлем қақтығыстарды тоқтатуға уақыт жоғалта алмайтынын айтып, Газа секторындағы соғысты тоқтатуға және ХАМАС ұстап отырған 48 тұтқынды босатуға шақырды.
«Біз бұдан әрі күте алмаймыз. Ештеңе соғысты жалғастыруды ақтай алмайды. Бұл соғысты тоқтататын сәт келді», – деді Макрон.
Франция осылайша Ұлыбритания, Португалия, Канада және Австралиядан кейін Палестина мемлекетінің тәуелсіздігін ресми мойындаған елдердің қатарына қосылды.
Алайда Израиль тарапы мұндай қадамға наразы. Израиль премьер-министрі Биньямин Нетаньяху Францияның шешімін «терроризмге берілген үлкен сый» деп бағалады. БҰҰ-дағы Израиль делегациясы Макронның сөзін тыңдаудан демонстратив түрде бас тартты.
Израильдің Франциядағы елшілігі мәлімдемесінде:
«ХАМАС 7 қазандағы қырғынды қайталауға уәде етіп отыр. Бұл Холокосттан кейін еврейлерге жасалған ең қанды шабуыл. Соған қарамастан кейбір мемлекеттер террористерді марапаттап отыр», – делінген.
Сауд Арабиясы Францияның шешімін «тарихи қадам» деп атап, өзге мемлекеттерді де Палестинаны мойындауға шақырды.
«Бұл қадам Таяу Шығыстағы бейбітшілік пен тұрақтылықты нығайтуға елеулі ықпал етеді», – деді елдің сыртқы істер министрі Фейсал бин Фархан.
Франциядағы солшыл саясаткер Жан-Люк Меланшон да бұл шешімді қолдап, «қырғын мен геноцидті тоқтатудың халық күресі жеңісінің нәтижесі» деп атады.
Ал Палестина тарапы шешімді «тарихи әрі батыл» қадам деп бағалады. Палестина көшбасшысы Махмуд Аббас:
«Франция, Сауд Арабиясы және Ұлыбританияның халықаралық қолдауды күшейтудегі рөлі орасан зор. Бұл – бейбітшілік пен «екі мемлекет» шешіміне жасалған үлкен қадам», – деді.
Палестинаның Сыртқы істер министрлігі де Париждің әрекетін жоғары бағалап, Францияны басқа елдерге үлгі болуға шақырды.