RUS
SMARTNEWS.KZ басылымының хабарлауынша, әлеуметтік желіде Қостанайдағы уақытша бейімдеу және айықтырғыш орталығында түсірілген бейнежазба тарады. Кадрларды 61 жастағы ер адамның қызы жариялады.
Видеоға сәйкес, орталықтың бір қызметкері бөлмеде темекі тұтатқаны үшін ер адамды аяусыз ұрып-соққан. Қызының айтуынша, әкесі ауыр жарақат алған: оң бүйрегі жыртылып, көп қан жоғалтқандықтан дәрігерлер оны алып тастауға мәжбүр болған. Сондай-ақ 11-ші және 12-ші қабырғасы сынған.
Оқиға биыл шілдеде болған. Қостанай облыстық полиция департаменті қылмыстық іс қозғалғанын хабарлады.
«Күдікті ұсталып, қамауға алынды, кейін үйқамаққа жіберілді. Қазір барлық тергеу шаралары жүргізілуде, жақын арада іс сотқа жолданады», – делінген полиция хабарламасында.
Жәбірленушінің қазіргі жағдайы әзірге белгісіз. Облыстық денсаулық сақтау басқармасы оқиғаға түсініктеме берген жоқ.