RUS
SMARTNEWS.KZ басылымының хабарлауынша, Ақтөбе қалалық соты жүзуден еңбек сіңірген бапкер Азамат Сарбасовты алаяқтық жасағаны үшін кінәлі деп тапты.
Тергеу мәліметінше, ол өткен жылдың күзінде және биыл көктемде шәкірттерімен бірге Шымкентте оқу-жаттығу жиынына барды деген құжаттар тапсырған. Осы негізде алғаш рет 1,5 миллион, кейін тағы 1,9 миллион теңге іссапар шығыны ретінде бөлінген.
Бухгалтерияға тапсырылған теміржол билеттері мен отырғызу талондары да жалған болып шыққан. Мемлекеттік аудит Сарбасовтың шәкірттерімен ешқандай жиынға бармағанын анықтады. Спортшылардың өздері де мұндай жиыннан бейхабар болған.
56 жастағы бапкер сотта кінәсін мойындады. Ақтөбе қаласының №2 соты оны 3 жыл 6 айға бостандығын шектеу жазасына кесіп, 6 жыл бойы мемлекеттік ұйымдарда, соның ішінде спорт мектептерінде жұмыс істеуге тыйым салды.
Алайда Конституцияның 30 жылдығына орай жарияланған амнистияға байланысты жаза мерзімі 2 жыл 4 айға қысқарды. Сонымен қатар, Сарбасов жәбірленуші өтемақы қорына 78,6 мың теңге төлеуі тиіс.