RUS
SMARTNEWS.KZ басылымының хабарлауынша, Ақтөбе облысында Қандыағаш қаласының әкімі Қазбек Аққайыр әйел адамды ұрып-соққаны үшін кінәлі деп танылды. Сот шенеунікке 314 560 теңге көлемінде айыппұл салды.
Тергеу барысында үйленген әкімнің жұмыс орнында көңілдесімен жанжал кезінде әйелге қол көтергені анықталды. Оқиға Жаңа жыл қарсаңында, әкімнің кабинетінде болған. Ерлі-зайыптылықтан тыс қатынаста жүрген қос тараптың арасында сөзге келіспеушілік туып, Аққайыр әйелдің мойнынан ұстап, бірнеше рет ұрған.
Сотта әкім кінәсін мойындамады, алайда өзінің «қателік жасағанын» айтып, отбасы алдында жауап беріп жатқанын жеткізді.
Тіпті ол Қасым-Жомарт Тоқаевтың әйелдердің қоғамдағы мінез-құлқы туралы сөзіне сүйеніп, өз әрекетін ақтауға тырысқан:
«Президент айтқан, айқайлап, тәртіп бұзатын әйелдер бар деп. Ондай әйелдер бізде де бар — Қандыағашта», – деген ол.
Сот Аққайырды «денсаулыққа қасақана жеңіл зиян келтіру» бабымен кінәлі деп танып, айыппұлмен шектелді. Сонымен қатар, ол зардап шеккен әйелге 100 мың теңге моральдық өтемақы және 100 мың теңге адвокат шығынын өтеуге міндеттелді.
Қазіргі уақытта Қазбек Аққайырдың қызметінен кетуі немесе тәртіптік жазаға тартылуы туралы ақпарат жарияланбаған.