Алматыда 18 жастағы студентті 16 ер адам жабылып сабаған: Анасы оқиғаның мән-жайын айтты

Акмаржан Ботбаеваның сөзінше, ұлын кафенің маңында белгісіз бір топ адам жабылып ұрып кеткен.

«Бүкіл бет сүйегі сынған. Мұрын мүлде бұзылған, бас-ми жарақаты бар. Қазір нейрохирургия бөлімінде жатыр. Бетіне, мұрнына ота жасау керек болады. Ұлым “есімді жиғанда, басымды тебіп жатыр екен” деді», — дейді әйел.

Оқиға түнде болған. Анасы болған жайтты тек таңертең, баласы ауруханаға түскенде білген. Айтуынша, Арман — медицина университетінің 2-курс студенті, сол түні достарымен демалуға шыққан, ешкімге тиіспеген.

«Олар мекемеден шығып келе жатқанда Арманға белгісіз қыз жүгіріп келіп, көмек сұраған. Бірақ жігіт жауап беріп үлгермей жатып, артынан біреу келіп ұрып жібереді. Арман есінен танып, тротуарға құлап түскен», — делінген хабарламада.

Жәбірленуші тарап шабуыл жасағандардың бәрін тауып, қатаң жазаға тартуды талап етіп отыр.

Заңгер Қайрат Молдахметовтің айтуынша, күдіктілердің қашып кету қаупі бар:

«Олар Шымкент қаласының тұрғындары екен. Сондықтан оларды уақытша қамауға алу керек еді деп есептеймін», — деді ол.

Полиция мәліметінше, бұл іс бойынша «денсаулыққа қасақана орташа ауырлықтағы зиян келтіру» бабымен іс қозғалған. Тергеуден кейін күдіктілер ешқайда кетпеу туралы қолхатпен босатылған.
Егер кінәлері дәлелденсе, оларға 5 жылға дейін бас бостандығынан айыру жазасы тағайындалуы мүмкін.