RUS
SMARTNEWS.KZ басылымының хабарлауынша, әлеуметтік желілерде Ресей әншісі Акмальдың (Akmal’) Петропавлда өткен концерті кезінде айтқан сөзі қызу талқыланып жатыр. Әнші көрермен ұсынған сыйлыққа қатысты пікір білдіріп, көпшіліктің ашуына тиді.
Бейнежазбада өнерпазға бір көрермен ішімдік салынған көк-сары түсті пакет бергені көрінеді. Сахнада Акмаль сол сәтте:
«Мына пакетті өртеп жіберіңдер, түсі ұнамай тұр», — дейді.
Желі қолданушылары пакеттің түсі Қазақстан туының реңктерімен сәйкес екенін байқаған. Осыдан кейін видеоны талқылаушылардың көбі әншінің сөзін ұлттық рәміздерге құрметсіздік деп қабылдап, наразылық білдірді.
Пікірлер бөлімінде ашулы жазбалар көбейді:
«Яғни оған біздің туымыздың түсі ұнамай ма? Онда неге Қазақстанға келіп концерт қойып жүр?», «Мұндай әдепсіз сөз айтқан адамды елімізге кіргізбеу керек!», «Бұл — сахнадағы қорлау, өнер емес!»
Сонымен қатар, желіде әншіні ақтап алғандар да табылды. Олар Акмальдың сөзі саясатқа немесе ел рәміздеріне қатысы жоқ, жай ғана әзіл деп түсіндіріп жатыр:
«Пакеттің түсі ашық болғаны ғана, саясат іздеп қажеті жоқ», «Ол Ресей азаматы, өз елін қолдайтыны заңды. Бұдан жау іздеу орынсыз».
Акмаль Абдулхалитович Ходжаниязов — Ресейлік музыкант, ұйғыр ұлтынан, Түрікменстанда туған. Ол «Из-за тебя», «Вдоль дорог» және «По полюшку» әндерімен танымал.
Қазір әнші Қазақстан бойынша гастрольдік сапарда жүр. Қазан айында оның Қостанай, Өскемен және Павлодарда концерттері жоспарланған.