RUS
SMARTNEWS.KZ басылымының хабарлауынша, Францияның Париж қаласында президент Эммануэль Макронның жұбайы Брижит Макронға қатысты кибербуллинг ісі бойынша сот тыңдаулары өтті.
Істе он адам — сегіз ер мен екі әйел айыпталушы ретінде жауапқа тартылды. Оларға бірінші ханым туралы жалған және қорлайтын ақпарат таратты деген айып тағылған.
Тергеу мәліметінше, айыпталушылар әлеуметтік желілерде Брижит Макрон туралы «ол ер адам болып туған», «өзінің ағасы Жан-Мишель Тронье» деген фейктер мен өсек-аяңды бірнеше жыл бойы таратып келген. Бұл жалған мәліметтер алғаш рет 2017 жылы пайда болған.
Күдіктілер өз жазбаларын «әзіл» немесе «сатира» ретінде бағалап, олардың шағын аккаунттары президент жұбайының беделіне «еш әсер ете алмайды» деп мәлімдеген.
Брижит Макронның адвокаттары кибершабуылдардың оның денсаулығы мен отбасылық өміріне нақты зиян тигізгенін айтты. Ал бірінші ханымның қызы, адвокат Тифен Озье сотта сөз сөйлеп, анасын әлеуметтік желілердегі үздіксіз шабуылдар «психологиялық тұрғыдан қажытқанын» жеткізді.
Прокуратура тоғыз айыпталушыға үштен он екі айға дейін шартты жаза және 8 мың еуроға дейін айыппұл тағайындауды сұрады. Ең қатаң жаза Орельен Пуарсон-Атлан есімді қолданушыға (псевдонимі — Зои Саган) ұсынылды, оны фейк-науқан ұйымдастырушыларының бірі деп есептейді.
Брижит Макронның қорғаушылары: «Сөз бостандығы — қорлау еркіндігі емес. Әзіл ешқашан травляны ақтай алмайды», — деп мәлімдеді.
Соттың қорытынды үкімі 2026 жылғы 5 қаңтарда шығарылады.