RUS
SMARTNEWS.KZ басылымының хабарлауынша, Жамбыл облысының Құшаман ауылында 123 оқушы әкімдік қызметкерлерімен бір ғимаратта оқуға мәжбүр. Себебі ауылдағы жалғыз мектеп апатты жағдайда деп танылып, биыл наурызда жабылған. «Жетінші арнаның» хабарлауынша, балабақша, кітапхана және полиция бөлімшесі де осы тар ғимаратқа тығылған.
«Мектеп апатты деп ресми шешім шыққаннан кейін бізді осында көшірді. Алты кабинет бар, екі ауысымда оқимыз», – дейді мектеп директоры Нұржан Сәденов.
Спорт залы жоқ – дене шынықтыру сабақтары далада өтеді. Ішкі санитарлық жағдай да сын көтермейді: дәретхананы ауыл тұрғындары өздері салып берген, ол да сыртта тұр.
Жергілікті билік жаңа мектеп салу жоспарда бар екенін айтады. Жобалық-сметалық құжаттама облысқа жолданыпты. Алайда құрылыс жұмыстары әлі басталмаған.
Мойынқұм аудандық білім бөлімі басшысы Мәлік Мұқашевтың сөзінше, 100 орындық жаңа мектеп 2027 жылы пайдалануға берілуі тиіс. Бірақ ауыл тұрғындары «тағы екі оқу жылын осылай өткіземіз бе?» деп алаңдаулы.