RUS
SMARTNEWS.KZ басылымының хабарлауынша, Air Astana алыс бағыттарға қызмет көрсету мүмкіндігін арттыру үшін Boeing 787-9 Dreamliner ұшақтарына ірі тапсырыс орналастырды.
Әуекомпания Boeing-пен 15 әуе кемесін жеткізу туралы келісімшартқа қол қойды. Тапсырыс бес расталған борттан, бес опционнан және бес сатып алу құқығынан тұрады. Бұл – Air Astana құрылғаннан бергі ең ауқымды сатып алу.
Жаңа келісім 2026–2027 жылдары жеткізілуі тиіс үш Dreamliner бойынша жасалған бұрынғы шартты толықтырады. Соның нәтижесінде жалпы тапсырыс көлемі 18 әуе кемесіне жетті. Олар 2032–2035 жылдар аралығында флотқа қосылады. Қозғалтқыштарымен бірге есептегенде, бұл партияның жалпы құны 7 миллиард долларды құрайды.
Компания басшылығының айтуынша, жаңа буын ұшақтары Орталық Азия мен Кавказдан Азия, Еуропа және өзге де аймақтарға бағыттарды кеңейту стратегиясының негізгі тетігі болмақ. Boeing 787-9 отын үнемдеу көрсеткішімен, ұзақ қашықтыққа қолайлы икемділігімен және жолаушыларға жайлылық деңгейін арттыруымен ерекшеленеді.
Air Astana Boeing ұшақтарын пайдалану тәжірибесіне сүйенеді. Тасымалдаушы 2002 жылы Boeing 737 ұшақтарымен Қазақстан және көрші елдер бағытында жұмысын бастады. Кейін Boeing 757 арқылы Азия мен Еуропаға алыс рейстер ашылды. Ал 2013 жылдан бері Boeing 767-300ER әуе кемелері халықараралық жүктемесі жоғары бағыттарға қызмет көрсетіп келеді.