Ақтөбеде әріптесін қарызға кіргізіп, өлтіріп, көміп кеткен қылмыскерге үкім шықты

SMARTNEWS.KZ басылымының хабарлауынша, Ақтөбе қаласының 32 жастағы тұрғыны әріптесін алдын ала жоспар бойынша өлтіргені үшін 20 жылға бас бостандығынан айырылды. Бұл туралы сот деректеріне сүйене отырып хабарланды.

Тергеу мәліметтеріне сәйкес, айыпталушы зауытта машинист болып еңбек еткен. Ол әріптесінің жұмысқа шыққанын аңдып, көлігіне отырғызып қала сыртына алып кеткен.

Қылмыс иесі жәбірленушіні 7,7 миллион теңге көлемінде несие рәсімдеуге және қаражатты танысының шотына аударуға күштеген. Ақшаны иемденген соң, жәбірленушіні тұншықтырып өлтіріп, мүрдені автокөлігінде жасырған.

Кейін Алға ауданына барып, танысынан күрек алдыртып, денені жасырған. Тергеу барысында айыпталушының кінәсі толық дәлелденді.

Сот оны кісі өлтіру және қорқытып ақша талап ету баптары бойынша айыпты деп танып, 20 жылға соттады. Қылмыстың ізін жасырған танысына 3 жыл 2 ай жаза тағайындалды.

Марқұмның отбасы 10 миллион теңге көлемінде моральдық өтемақы өндіруге құқылы деп танылды.