Министр Әлназарова ұшақтағы жолаушыны аман алып қалды (ВИДЕО)
Денсаулық сақтау министрі жағдайы күрт нашарлаған жолаушыға дереу көмек көрсеткен.
SMARTNEWS.KZ басылымының хабарлауынша, Астана–Алматы бағытымен ұшқан таңғы рейсте денсаулығы күрт нашарлаған жолаушыға Қазақстанның денсаулық сақтау министрі Ақмарал Әлназарова тікелей көмек көрсеткен. Бұл оқиға туралы әлеуметтік желіде тараған жазбадан кейін оны ведомствоның баспасөз қызметі растады.
Оқиға ұшақ ұшуға дайындалып жатқан сәтте болған. Бір жолаушы кенет әлсіреп, жағдайы нашарлаған кезде бортпроводниктер дәрігер іздеген. Сол уақытта бортта отырған әйел жолаушы жанында тез арада алғашқы көмек көрсете бастаған.
Автор Айгүл Елеместің айтуынша, ол әйел қан қысымын өлшеп, жағдайды тұрақтандыру үшін таблетка, су, шай беруді ұйымдастырған. Кейін ол өзінің дәрігер екенін ғана қысқа түрде айтқан. Жолаушы өзін ұшуды жалғастыра алатынын жеткізгеннен кейін рейс әдеттегі тәртіппен орындалған.
Кейін мәлім болғандай, алғашқы көмек көрсеткен жолаушы — денсаулық сақтау министрі Ақмарал Әлназарова. Министрлік те бұл ақпаратты ресми түрде растады:
«Иә, рас. Ақмарал Әлназарова бортта гипертониялық кризді бастан өткерген жолаушыға көмек көрсетті».
Бұған дейін министр жедел жәрдем қызметкерлеріне арнаған қатқыл үндеуімен де қоғам назарын аудартқан еді.
Материал авторы
