RUS
SMARTNEWS.KZ басылымының хабарлауынша, 19 желтоқсанда Қазақстанның бірқатар өңірінде ауа райы күрт нашарлайды. Синоптиктер қар, бұрқасын, тұман, көктайғақ және екпінді желге байланысты бірнеше облыста дауылды ескерту жариялады.
Жетісу облысының таулы аудандарында тұман мен көктайғақ күтіледі. Алакөл көлдері маңында желдің екпіні секундына 15–20 метрге дейін жетеді.
Астанада күндіз қар жауып, жаяу бұрқасын соғады. Жолдарда көктайғақ болады. Оңтүстік-батыстан соғатын желдің екпіні 15–20 м/с.
Ақмола, Павлодар, Қостанай, Солтүстік Қазақстан облыстарында қар мен бұрқасын күтіледі, кей жерлерде қатты қар жауады. Жел күшейіп, екпіні 20–25 м/с-қа дейін жетуі мүмкін.
Қарағанды және Ұлытау облыстарында аздаған қар жауып, жаяу бұрқасын байқалады. Жел екпіні 15–18 м/с.
Абай және Шығыс Қазақстан облыстарында түнде қар, күндіз жаяу бұрқасын күтіледі. Тұман түсіп, желдің екпіні 15–20 м/с-қа дейін күшейеді.
Батыс Қазақстан, Атырау, Маңғыстау облыстарында көктайғақ пен тұман болады. Батыс Қазақстанда жаңбыр мен қар аралас жауын-шашын күтіледі.
Түркістан, Жамбыл және Алматы облыстарының таулы аудандарында тұман мен көктайғақ сақталады, кей жерлерде қар жауады.