RUS
SMARTNEWS.KZ басылымының хабарлауынша, Ақтөбе қаласында зергер ұсталып, уақытша ұстау изоляторына қамалды. Ол клиенттерге тиесілі алтын бұйымдарды ломбардқа өткізіп отырған деген күдікке ілінді. Бұл туралы Ішкі істер министрлігі мәлімдеді.
Мәліметке сәйкес, Ақтөбедегі орталық базар маңында орналасқан зергерлік шеберханалардың біріне қатысты тұрғындардан полицияға бірнеше шағым түскен. Тексеру барысында зергердің азаматтардан алтын бұйымдарды жөндеуге немесе әшекей жасап беруге қабылдағаны анықталған.
Алайда тергеу деректеріне сүйенсек, ол сеніп тапсырылған қымбат бұйымдарды ломбардқа өткізіп, түскен қаражатты жеке басының қажетіне жұмсаған.
ІІМ мәліметінше, күдікті кемінде 20 алаяқтық дерегіне қатысы бар. Келтірілген жалпы материалдық шығын 12 миллион теңгеден асады.
Қазіргі уақытта аталған факті бойынша сотқа дейінгі тергеу амалдары жүргізіліп жатыр. Күдікті уақытша ұстау изоляторына қамалды.