RUS
Министрдің айтуынша, жалпы, биылғы жылдың бірінші тоқсанында республика бойынша ластаушы заттар шығарындыларының нақты көлемі 0,5 млн тоннаны құрап, оның ішінде Ақмола өңіріне 36,2 мың тонна тиесілі, бұл 2022 жылдың 1 тоқсанындағы деңгейден 2,4 пайызға төмен. Бұл көрсеткішке табиғатты қорғау шараларын жүзеге асыру арқылы қол жеткізілген.
«Ақмола облысы бойынша экологиялық мәселелерді шешу бағытында Жол картасы бойынша 30 іс-шара көзделген. Оның үшеуі орындалды. Облыста қалдықтарға қатысты әлсіз инфрақұрылым, қатты тұрмыстық қалдықтар полигондарының нормаларға сәйкес келмеуі, рұқсат етілмеген полигондардың санының көп болуы сияқты мәселелер бар», - деді министр Зульфия Сүлейменова.
Министр атап өткендей, Ақмола облысында облыстық маңызы бар 6 қала мен аудан бөлек жинау және сұрыптаумен қамтылған, яғни, республика бойынша осындай 768 кәсіпорынның 25-і Ақмола облысына тиесілі.
«Рұқсат етілмеген полигондардың көбеюі, әсіресе елордалық аймақта алаңдаушылық туғызады. Космомониторинг аясында биыл өңірде 830 рұқсат етілмеген қалдықтарды орналастыру орны анықталып, оның 88 пайызы жойылды», - деп түйіндеді министр.