RUS
SMARTNEWS.KZ басылымының хабарлауынша, cиноптиктер 3 сәуір күні Қазақстанның он қаласында қолайсыз метеорологиялық жағдай қалыптасатынын ескертті. Бұл туралы «Қазгидрометке» сілтеме жасаған Kazinform агенттігі хабарлады.
Мамандардың болжамынша, ауа ластануы күшейетін өңірлер қатарында Петропавл, Павлодар, Қарағанды, Теміртау, Атырау, Өскемен, Риддер, Семей, Алматы және Астана бар.
Қолайсыз метеорологиялық жағдайлар – желдің болмауы немесе әлсіз соғуы, тұман, ауа қабаттарының инверсиясы сияқты факторлардың жиынтығы. Мұндай кезде зиянды заттар атмосфераның төменгі қабатында жиналып, таралмай қалады.
Соның салдарынан елді мекендерде ауа сапасы күрт төмендеп, бұл тұрғындардың денсаулығына кері әсер етуі мүмкін.
Сарапшылардың айтуынша, ластану деңгейіне ең алдымен желдің бағыты мен жылдамдығы, ылғалдылық, жауын-шашын және ауа температурасы әсер етеді.
Осыған байланысты мамандар тұрғындарға сақтық шараларын ұстануды ұсынады. Атап айтқанда, ашық ауада ұзақ болуды шектеу, әсіресе көлік көп жүретін жолдардың маңында серуендемеу маңызды. Балалар мен жүкті әйелдерге ұзақ уақыт сыртта болудан бас тартқан жөн.
Созылмалы өкпе, жүрек-қан тамыры немесе аллергиялық аурулары бар адамдар өзімен бірге қажетті дәрі-дәрмектерін алып жүруі тиіс. Сондай-ақ, ашық ауадағы физикалық жүктемені азайтып, спортпен жабық ғимараттарда айналысу ұсынылады.