Алматыда пышақ ұстаған ер адам көшеде адамдарды қуған
Полиция күдіктіні жедел анықтап, бөлімшеге жеткізген.
SMARTNEWS.KZ басылымының хабарлауынша, Алматыда түн ішінде тұрғын үй аулаларының бірінде қолына пышақ ұстаған ер адам өтіп бара жатқан адамдарға шабуыл жасауға әрекеттенген. Оқиға видеоға түсіп, әлеуметтік желілерде кең таралды.
Кадрларда ер адамның аулада пышақпен жүгіріп, кездейсоқ адамдарды қуып жүргені анық көрінеді. Оқиға тұрғындар арасында алаңдаушылық туғызды.
Алматы қалалық полиция департаменті бұл дерек бойынша күдіктінің анықталып, ұсталғанын хабарлады. Ол полиция бөлімшесіне жеткізілген.
Құқық қорғау органдарының мәліметінше, ер адам мас күйде болған. Полиция қызметкерлерінің жедел әрекетінің арқасында ол дер кезінде тоқтатылып, залал келтірудің алдын алу мүмкін болған.
Қазіргі уақытта оның әрекетіне құқықтық баға беріліп, процессуалдық шешім қабылданады.
Материал авторы
