RUS
SMARTNEWS.KZ басылымының хабарлауынша, Қостанай облысында криминалдық полицияның үш қызметкері пара алды деген күдікке ілінді. Күдіктілер ұсталып, қамауға алынды.
Рудный қалалық криминалдық полиция бөлімінің үш қызметкері пара алу фактісі бойынша тергеуге тартылған. Бұл ақпаратты облыстық полиция департаменті растады. Қазір аталған іс бойынша сотқа дейінгі тергеу жүргізіліп жатыр.
Ресми мәліметке сәйкес, 2026 жылғы 17 наурызда ҰҚК-нің Қостанай облысы бойынша сыбайлас жемқорлыққа қарсы қызметі мен полиция департаментінің ішкі қауіпсіздік басқармасы бірлескен операция өткізген. Нәтижесінде Қылмыстық кодекстің 366-бабы 3-бөлігі бойынша қозғалған іс аясында үш полицей ұсталған.
Сот санкциясымен күдіктілерге қатысты қамау түріндегі бұлтартпау шарасы таңдалды.
Аталған бап параны қорқытып алу жолымен, алдын ала сөз байласқан топпен немесе ірі көлемде әрі бірнеше рет алу әрекеттерін қамтиды. Заң бойынша мұндай қылмыс үшін айыппұл немесе 7 жылдан 12 жылға дейін бас бостандығынан айыру жазасы қарастырылған. Сонымен қатар мүлікті тәркілеу және өмір бойы белгілі бір қызметтерді атқару құқығынан айыру санкциялары қолданылады.