Арыста мас күйде көлік жүргізген мұғалім жүкті әйел мен екі баланы қағып өлтірді
Түркістан облысында мас күйінде көлік айдап, үш адамның өліміне себеп болған 52 жастағы әйел сотталды.
SMARTNEWS.KZ басылымының хабарлауынша, Түркістан облысында мас күйінде көлік жүргізіп, жүкті әйел мен екі баланың өліміне себеп болған 52 жастағы Бибінұр Избасароваға сот үкімі шықты. Бұл туралы Almaty.tv арнасы хабарлады.
Қайғылы жол апаты 6 маусым күні Арыс қаласында болған. Жеке үйдің алдында орындықта отырған әйелдер мен балаларды жоғары жылдамдықпен келе жатқан жол талғамайтын көлік қағып кеткен. Көлік бұған дейін қоршауды бұзып өткен.
Апат салдарынан 30 жастағы жүкті әйел, оның екі жасар ұлы және көрші тұратын бес жасар қыз оқиға орнында көз жұмған. Тағы бірнеше адам түрлі деңгейде жарақат алған.
Сараптама көлік тізгінінде болған Бибінұр Избасарованың апат кезінде мас болғанын анықтаған.
Сот 9 жылға бас бостандығынан айырды
Түркістан облысының қылмыстық істер жөніндегі мамандандырылған ауданаралық соты сотталушыны Қазақстан Республикасы Қылмыстық кодексінің 345-бабының 4-бөлігі бойынша кінәлі деп таныды.
Судья Марат Күздебаевтың айтуынша, Избасароваға 9 жыл бас бостандығынан айыру жазасы тағайындалып, көлік құралын басқару құқығынан өмір бойына айырылды.
Сотталушы өз кінәсін мойындап, жасаған ісіне өкінген. Ол жазаны жеңілдетуді сұрап, 12 жастағы мүгедектігі бар қызын тәрбиелеп отырғанын айтқан.
Сот бұл жағдайды ескеріп, жазаны орындауды бір жылға кейінге қалдыру туралы шешім қабылдаған.
Марқұмдардың туыстары үкіммен келіспеді
Қаза болғандардың жақындары сот шешіміне наразылық білдірді. Олар үш адамның өмірін қиған қылмыс үшін тағайындалған жазаны тым жеңіл деп санайды.
Марқұмдардың туысы Ағайша Манатованың айтуынша, бір отбасы орны толмас қайғыға қалған.
«Үш адамның өмірі үшін 9 жыл ғана ма? Ол тірі, дені сау, еркіндікке шығады. Ал бізде анасыз қалған төрт жасар бала бар. Ол күн сайын жылағанда жүрегім ауырады. Мұнда әділдік қайда?» – деді ол.
Сот зардап шеккендердің моральдық және материалдық шығынды өтеу туралы талаптарын ішінара қанағаттандырды.
Үкім әзірге заңды күшіне енген жоқ. Тараптар сот шешіміне шағым түсіре алады.
Материал авторы
