Қызылордадағы мұнай өңдеу зауытында ірі өрт шықты
Өрт кезінде екі резервуардағы 120 тонна мұнай өнімі өртеніп кетті.
SMARTNEWS.KZ басылымының хабарлауынша, Қызылордадағы мұнай өңдеу кәсіпорнының аумағында ірі өрт шығып, 120 тонна мұнай өнімі бар екі резервуар отқа оранды. Жалын жақын маңдағы тағы үш сыйымдылыққа таралу қаупін тудырған. Бұл туралы Қызылорда қаласы Төтенше жағдайлар департаменті жазды.
Өрт Шоқай көшесінде орналасқан кәсіпорында болған. Әрқайсысы 60 тонна мұнай өнімін сақтауға арналған екі резервуар өртке оранған кезде, оқиға орнына алғашқы өрт сөндіру жасақтары жеткен.
Кәсіпорын аумағында тағы үш резервуар тұрған. Жалын оларға тараған жағдайда жағдай әлдеқайда күрделенуі мүмкін еді.
Өртті сөндіруге Төтенше жағдайлар министрлігінің бөлімшелері, қалалық қызметтер мен өрт сөндіру пойызы жұмылдырылды. Оқиға орнында жедел штаб құрылып, көрші резервуарларға жалын жетпеуі үшін оларды лафеттік оқпандар арқылы үздіксіз салқындатқан. Өрттің негізгі ошағын сөндіру үшін арнайы көбік қолданылды.
Қызылорда қаласы Төтенше жағдайлар департаментінің мәліметінше, өрт сөндірушілердің жедел әрі үйлесімді әрекетінің арқасында жалынның таралуына жол берілмей, үш көрші резервуар сақталған.
Өрт жалпы аумағы 200 шаршы метр жерді шарпыған. Құтқарушылар жалынды толықтай сөндірді.
Материал авторы
