RUS
Жайық-Каспий облысаралық балық шаруашылығы бассейндік инспекциясының өкілі Олег Тушкановтың айтуынша, «Бекіре – 2023» балық акциясы басталғаннан бері табиғат қорғау заңнамасын бұзған 754 дерек тіркелген. Заңсыз балық аулаған 518 адам әкімшілік жауапкершілікке тартылған.
«Браконьерлікке, сирек кездесетін және құрып кету қаупі төнген балық түрлерін заңсыз аулауға байланысты 28 қылмыстық іс қозғалды. Мәселен, Атырау-Құрманғазы тас жолында тоқтатылған «Лада-Приора» автокөлігінен 47 келі, Атырау қаласындағы Балықшы шағын ауданында «ВАЗ-2115» автокөлігінің жүк салғышынан 121 келі 300 гр бекіре тұқымдас балықтар табылып, тәркіленді. Ал, Ақтау қаласында «Toyota Ipsum» көлігінен салмағы 19,7 келі бекіре тұқымдас балықтар мен 1,5 келі қара уылдырық табылды. Құқық бұзушыларға 11,1 млн теңге айыппұл салынды», -деп хабарлады Олег Тушканов.
Оның дерегіне сүйенсек, заңсыз айналымнан 7 тонна 534 келі балық алынған. Тәркіленген су маржанының арасында 770,25 келі бекіре тұқымдас балықтар, 29,5 келі қара уылдырық бар.
Сондай-ақ, браконьерлерден 257 балық аулау құралы, 62 су көлігі мен 12 автомашина тәркіленген. Жайық өзенінің арнасы мен Каспий теңіз акваториясынан жалпы ұзындығы 60 шақырымнан асатын 663 балық аулау құралдары алынған.
«Бекіре – 2023» акциясы 31 мамырға дейін жалғасады.