Жеңіс Қасымбек LRT-ның екінші кезеңі қалай салынып жатқанын айтты
«Астана-1» теміржол вокзалы бағыты тоғыз станцияны қамтиды, оның ішінде №201 ауысып міну станциясы да бар.
SMARTNEWS.KZ басылымының хабарлауынша, Астанада жеңіл рельсті көлік жүйесінің екінші кезеңін салу жұмыстары жалғасып жатыр. Қала әкімі Жеңіс Қасымбектің мәліметінше, Tarlan Astana іске қосылғалы бері жолаушылар 11,5 миллионға жуық сапар жасаған. Жобаның келесі кезеңі елордадағы көлік инфрақұрылымын кеңейтуге бағытталған.
Жеңіс Қасымбек Instagram парақшасында құрылыс барысы туралы ақпарат жариялады. Оның айтуынша, жеңіл рельсті көлік тұрғындар арасында сұранысқа ие болып, күнделікті қатынас құралына айналып келеді.
Қазір LRT желісін бірнеше бағытта ұзарту жұмыстары жүргізілуде.
Қосшы бағыты
Бұл бағытта үш станция салу көзделген. Қазіргі уақытта тіректер, эстакадалық құрылымдар мен станцияларды тұрғызу жұмыстары жүріп жатыр. Әкімнің мәліметінше, бүгінге дейін 294 тірек орнатылған. Бұл жоспарланған көлемнің 97 пайызына тең. Ал 385 эстакадалық құрылым монтаждалған, яғни жұмыс көлемінің 73 пайызы орындалған.
2026 жылдың соңына дейін №401, №402 және №403 станцияларындағы бетондау жұмыстарын аяқтау жоспарланып отыр.
Жағалау шағынауданы бағыты
Бұл учаскеде сегіз станция салу қарастырылған. Геологиялық зерттеу жұмыстары аяқталған. Қазір құрылыс аумағына қоршаулар орнатылып, алдағы құрылыс-монтаж жұмыстарына дайындық жүргізілуде. Сонымен қатар инженерлік желілерді көшіру және қайта орналастыру жұмыстары атқарылып жатыр.
«Астана-1» теміржол вокзалы бағыты
Елордадағы теміржол вокзалына қарай созылатын бағытта тоғыз станция салу жоспарланған. Олардың қатарында №201 ауысып міну станциясы бар. Бұл бағыттағы геологиялық зерттеулер де аяқталған.
Бұдан бөлек, Сығанақ даңғылының бойында, Қабанбай батыр және Тұран даңғылдарының арасындағы учаскеде №201 және №301 станцияларын байланыстыратын ауысып міну торабы салынып жатыр.
Жеңіс Қасымбектің хабарлауынша, Қазақ радиосы көшесі мен Қабанбай батыр даңғылының арасындағы учаскеде екі тірек бетонмен бекітілген. Қалған аумақтарда қадалар мен ростверктерді орнату жұмыстары жалғасуда. Басқа учаскелерде келесі құрылыс кезеңіне дайындық жүргізіліп жатыр.
Әкімнің айтуынша, жеңіл рельсті көлік желісін кеңейту елордада заманауи әрі тұрғындарға қолайлы көлік жүйесін қалыптастырудың маңызды қадамы болмақ.
Материал авторы
