RUS
Жылыой ауданындағы «Промэкология» ЖШС-нің өндірістік полигонында өндірістік және тұрмыстық қалдықтар өртенген. Әлеуметтік желіде полигондағы қара түтіннің будақтағаны түсірілген видео тарады.
Облыстық экология департаментінің баспасөз қызметінен мәлім еткендей, полигон аумағында ағаш жаңқалары тұтанған. Кейін қатты желдің салдарынан жалын ескі шиналар жиналған алаңға тараған. Жалын 100 шаршы метр аумақты шарпыған.
«Осыған байланысты облыстық экология департаментіне Жылыой ауданының прокуратурасынан қатынас хат пен жергілікті тұрғын М.Нұрғазиевтің өтініші түсті. Департамент мамандары тексеру жүргізіп, «Промэкология» ЖШС-нің полигонындағы жанған қалдықтар үшін әкімшілік құқықбұзушылық туралы хаттама толтырылды. Серіктестікке қысқартылған түрде 86 мың 250 теңге әкімшілік айыппұл салынды. Айыппұл өндіріліп алынды», -деп хабарлады департаменттің баспасөз қызметі.
Еске сала кетелік, бұдан бұрын Атырау облысында заңсыз 34 полигон анықталған.
Кейін ғарыштан барлау арқылы 68 қоқыс алаңы табылған.
Атырау облыстық экология департаментінің басшысы Әлібек Бекмұхаметовтің айтуынша, «Қазақстан Ғарыш сапары» ҰК» АҚ түсірілімімен анықталған қоқыс алаңдары геопорталдың базасына тіркелген.
«Атырау облысының аумағында 68 заңсыз орналасқан қоқыс орны анықталды. Оның ішінде Атырау қаласында 63 қоқыс орны бар. Ал, Жылыой ауданының аумағында - 3, Мақат ауданында - 2 қоқыс алаңы орналасқан. Қазір қоқыс алаңдарын тазалау жұмыстар өте баяу жүргізілуде. Әлі күнге дейін аяқталған жоқ. Тазаланған орындар туралы ақпараттар мен құжаттар геопорталдан алып тастау үшін департаментке жолданбай отыр», -деп мәлім етті Әлібек Бекмұхаметов.