RUS
Threads жаңа әлеуметтік желісі шыққаннан кейін бір аптадан соң оған 100 миллион адам тіркелген болатын. Қосымшаның үлкен танымалдылығына байланысты алаяқтықтың жаңа әдістері пайда болды.
«Касперский зертханасы» сарапшылары жаңа әлеуметтік желідегі ақпаратты қолды қылатындардың мынадай жағдайларын анықтады:
Фишинг. Алаяқтар Threads-тің жалған веб-нұсқасын жасау арқылы жасырылған фишинг беттерді таратады. Егер сіз осындай ресурсқа аккаунт деректеріңізді енгізсеңіз, онда ол желі қаскөйлерінің қолына түседі. Threads желісі Instagram мен Facebook сияқты Meta қызметтерінің бірі болғандықтан, Threads-тен бөлек, басқа аккаунттарыңыздан айырылып қалуыңыз мүмкін. Сондықтан жіберілген сілтемені тексерген абзал.
Криптовалютаға инвестициялар. Тағы бір алаяқтық схема – жалған Threads Coin Cryptocurrency инвестициясына байланысты. Сіз оны басқа криптографиялық ақшаға – эфериум (Ethereum) арқылы сатып ала аласыз. Бұл схема арқылы инвестиция салдым деп, ақшасынан айырылғандар саны да күрт көбейді.
Скам. Алаяқтар пайдаланушыларға жазылушыларды тегін көбейтеміз деген сілтеме жолдайды. Threads аккаунтта 10, 25 немесе 50 мың жазылушыны тегін алғыңыз келсе, тек комиссияның ақысын төлеуді сұрайды. Сонымен қатар, алаяқтар басқа адамдарға да осы акция сілтемесін таратуды сұрап, жеке мәліметтер мен ақшаны қолды қылады.
Threads желісін жасаушылар мен «Касперский зертханасының» сарапшылары күдікті сілтемелер мен белгісіз мекен-жай хабарламаларынан сақ болуды ескертеді.