RUS
Штаб отырысы барысында Мемлекет басшысының ауыл халқының табысын арттыру жөніндегі «Ауыл аманаты» бағдарламасын іске асыру туралы тапсырмасын орындау мәселесі қаралды.
Биыл Бағдарламаны жүзеге асыруға республикалық бюджеттен 100 млрд теңге бөлінген. Сондай-ақ 17 мың шағын несие беру жоспарланған. Ал ол ауылдарда 18 мыңнан астам жаңа жұмыс орнын ашуға мүмкіндік береді.
Дегенмен Бағдарламаны жүзеге асыруға он облыс қана белсенді түрде кіріскен. Ал жеті өңірде жұмыс қарқыны баяу. Бір өкініштісі, үш өңірде бірде-бір өтінім (Шығыс Қазақстан, Маңғыстау және Абай облыстары) мақұлданбаған.
- Халықпен белсенді жұмыс істеу керек. Аудандар мен ауылдық округтердің әкімдері тұрғындармен тұрақты байланыста болып, микрокредиттің шарттары мен пайдасын түсіндіруге тиіс. 5-7 жылға 2,5%-бен несие беру өте тиімді шарт болып табылады. Мұны қарапайым тілмен және дұрыс түсіндіру керек, - дейді Смайылов.
Премьер-министр Әлихан Смайылов облыс әкімдіктеріне берілген қаражаттың толық игерілуін, олардың мақсатты пайдаланылуын әрі уақтылы қайтарылуын қамтамасыз етуді, сондай-ақ 2023 жылға арналған Бағдарлама көрсеткіштеріне қол жеткізуді бақылауда ұстауды тапсырды.