RUS
Тимурдың бұл кәсіпті қолға алғанына алты жылдың жүзі болған. Ол бір күнде 10-нан аса тандыр қалыбын жасайды. Жұмысы сапалы шығуы үшін сары, қызыл топырақты пайдаланады. Су араластырып, әбден илейді. Кейін қалыпқа салып, тандыр пешті дайындайды. Лайдан жасалған тандыр 5-6 күн бойы күн астына кебуі қажет. Содан соң саудаға шығарылады.
«Қолда барды ұқсатып, іс қылса, ешкім ешкімге алақан жаймайды. Табыстың көзі – еңбекте» - дейді Тимур.
Жалпы ұста бір айда 360 тандыр пешін жасап, саудаға шығарады. Біреуінің бағасы 6 мың теңгеден басталып, сапасына қарай 100 мың теңгеге дейін жоғарылай береді.
Тимурға жұбайы Бибігүл де көмектеседі. Оның айтуынша, пеш жасаудың өзіндік қыр-сыры, қиыншылығы бар.
«Тандыр пеш жасауды қайын атамыз Өзбекстаннан үйреніп келген. Кейіннен ол кәсіпті үйдегі отағасы, бала-шағамызбен үйреніп алдық. Қазір күнкөріс табысымызға айналды. Әрине, бұл жаз мезгілінде ғана атқарылатын шаруа. Сондықтан бар күшімізді саламыз. Күніне 10-12 тандырға дейін жасаймыз. Кейде тапсырыс көбейген кезде 1 айда 150-200 данасын жасап шығарамыз. Әр апта сайын күйеуім оларды базарға алып шығады», – дейді ол.
Қазіргі таңда кәсіпкер отбасының қолынан шыққан пешті тұтынушылар көп. Бастапқыда тек Келес ауданындағы елді мекен тұрғындары сатып алатын болса, бүгінгі күні Шардара, Жетісай, Мақтаарал, Сарыағаш аудандарынан арнайы іздеп келетіндер бар.
Сондай-ақ ерлі-зайыпты ауылдан наубайхана ашқан. Өздері жасаған тандыр пеште күніне 200-ден аса нан пісіріп, сатады. Қазіргі кезде 4 адамды тұрақты жұмыспен қамтып отыр.
Кәсіпкер отбасы 2021 жылы наурыз айында «Еңбек» нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған мемлекеттік бағдарламасы аясында грант жеңіп алған. Енді алдағы уақытта 2,5 пайыздық несие алып, екінші наубайхана ашуды жоспарлап отыр.
