RUS
SMARTNEWS.KZ басылымының хабарлауынша, Бали аралында есірткімен ұсталған екі қазақстандық азамат ауыр жазаға тартылуы ықтимал. Олардың жанынан шамамен 50 грамм кристалды метамфетамин табылған. Бұл туралы ҚР Сыртқы істер министрлігі мәлімдеді.
Қазір Индонезия полициясы тергеу жүргізіп жатыр, ал ұсталғандар арасында АҚШ азаматы да бар. Қазақстандықтар өз еркімен консулдық көмек сұрап, елшілік Джакартадағы құқық қорғау органдарымен және туыстарымен байланыс орнатқан.
«Индонезиялық тарап шешім қабылдаған соң бізге хабар береді. Қазір біздің елшілік пен консулдар жағдайды бақылап отыр. Азаматтармен тұрақты байланыстамыз», – деді Сыртқы істер вице-министрі Әлібек Бақаев.
Оның айтуынша, Қазақстан 2014 жылдан бері Индонезияға сотталғандарды елге қайтару туралы келісімұсынған. Алайда, құжат әлі қол қойылмаған.
Индонезияда есірткіге қатысты заңдар өте қатаң: өлім жазасына дейінгі жаза қарастырылған. Сондықтан бұл іс Қазақстан дипломаттарының ерекше бақылауында.
СІМ азаматтарды шетелге шыққанда сол елдің заңдарын қатаң сақтауға шақырады.
Айта кетейік, индонезиялық билік соңғы екі айда наркобизнеске қарсы операция барысында 285 адамды, соның ішінде 7 шетел азаматын, ұстағанын хабарлады. Олардың арасында екі қазақстандық бар.