RUS
SMARTNEWS.KZ басылымының хабарлауынша, ресейлік «Поток» (кей деректерде — «Труба») әскери операциясына қатысқан сарбаздар өкпе обыры мен өкпе артериясының тромбоэмболиясына шалдыққан. Бұл туралы ресейлік пропагандист Анастасия Кашеварова хабарлады.
Оның айтуынша, наурыз айында Суджа қаласы маңындағы Украина армиясының позициясына жету үшін жүздеген әскери 15 шақырымға жуық газ құбырымен еңбектеп өткен. Құбыр қаңтар айынан бастап пайдаланудан шығарылған.
Кашеварованың жазуынша, сарбаздарға тек 100 мың рубль көлемінде өтемақы берілген, ал ресми диагноз ретінде тек «орташа дәрежелі бронхит» қойылған. Қазірдің өзінде бірнеше сарбаздың жағдайы нашарлап, өкпе қатерлі ісігіне немесе тромбоэмболияға айналған.
«100 мың рубльді итке лақтырғандай берді. Награда жоқ. Диагноз — жай бронхит. Ал шын мәнінде бұл — әскери қызметтің салдары. Бірақ ол тіпті «соғыс жарақаты» ретінде де танылмаған, сондықтан толық өтемақы да қарастырылмаған», – деп жазды Кашеварова Telegram парақшасында.
Оның айтуынша, бұл жағдай Генштабтағы жоғары лауазымдылардың немқұрайлылығын көрсетеді.
«Поток» жауынгерлерін марапаттауға қарсы шенділер өздері газ құбырының ішінде екі күн жатып көрсінші. Шыдар ма екен?!», – дейді Кашеварова ашынып.
«Ахмат» арнайы жасағының командирі, генерал-лейтенант Апти Алаудинов та бұған дейін операцияға қатысқан сарбаздардың көбі өкпеге қатысты ауыр дертпен ауруханаға түскенін растаған.
«Құбыр ішінде ұзақ уақыт жүру сарбаздардың ішкі ағзаларына қатты әсер етті. Дәл қазір көпшілігінің тыныс алу жүйесі зақымданған», – деген еді ол ТАСС агенттігіне.
Еске салайық, операция Суджа қаласынан Украина Қарулы күштерін ығыстыру мақсатында 2025 жылғы наурызда өткен. Қаланың бақылауын қайта алу үшін әскери бөлім пайдаланылмай тұрған газ құбыры арқылы жасырын кірген.