Елімізде балалар боғауыз сөз айтқаны үшін ата-аналар жазаланады

SMARTNEWS.KZ басылымының хабарлауынша, ІІМ Әкімшілік полиция комитетінің төрағасы Қайсар Сұлтанбаев бұл – фейк емес, расында да ата-аналар баланың қоғамдық тәртіпті бұзуына жауапты екенін жеткізді. Егер кәмелетке толмаған жасөспірім бала қоғамдық жерде боқтанып, заң бұзса – бұл үшін ата-анасы жауапқа тартылады.

"Біз Сингапур сияқты тәртіпке негізделген ел болғымыз келеді. Тәртіпке бағыну – мемлекеттің іргетасы. Мат айту, түкіру, темекі тұқылын тастау – бәрі де тәртіп бұзушылық", – дейді Сұлтанбаев.

Айыппұл мөлшері қандай?

Ювеналды полиция басқармасының басшысы Асет Оспанов ҚР ӘҚБтК 127-бабына сілтеме жасайды. Бұл бапта – ата-ананың баланы тәрбиелеу бойынша міндетін орындамауы қарастырылған.

Бірінші рет бұзса – 5 АЕК (шамамен 19 660 теңге),

Қайталанса – 15 АЕК (шамамен 58 980 теңге),

Қайталанатын немесе ауыр жағдайларда – ата-ана 5 тәулікке дейін әкімшілік қамауға алынуы мүмкін.

"Баланың мінез-құлқы, мектеп пен көршілердің мінездемесі, отбасындағы жағдай – бәрі ескеріледі. Шешімді тек сот қабылдайды", – дейді Оспанов.

Ал егер бала әлі кішкентай болса ше?

Полиция өкілдері бәрін заң бойынша емес, қоғамдық сана мен контекстті де ескеріп қарап жатқанын айтады.

"3-4 жасар бүлдіршін байқамай бірдеңе айтса – ата-анасына түсіндірумен шектелеміз. Бірақ 14–15 жастағы бала саналы түрде боқтаса – бұл жауапкершілікті қажет етеді", – дейді Сұлтанбаев.

Неге дәл қазір талқыланып жатыр?

ІІМ мәліметінше, бұл заң бұрыннан бар. Қазір тек сандық бақылаудың күшеюі, видеобақылау, видеожетондар, тұрғындардың белсенділігі арқасында бұл норма жиірек қолданылып жатыр.

Қалай дәлелденеді?

– Патрульдік полиция видеожетонмен түсіріп, хаттама толтыра алады;

– Көршілер, КСК, ОСИ, әлеуметтік желідегі жарияланымдар арқылы да сигнал келіп түсуі мүмкін;

– Учаскелік полиция материал жинап, сотқа жібереді, шешімді сот қабылдайды.