RUS
4 жасар ұлы Данилді өлтірген қанды қол қылмыскерге өмір бойы бас бостандығынан айыру туралы шешім шығарылды. Үш балалы 41 жастағы Ахунов өз ұлын басынан соққы беру арқылы өлтірген. Бұны сараптама қорытындысы да растады.
- 2022 жылдың 23 желтоқсанында Артур Ахунов 4 жасар ұлы суық тиіп ауырған соң, еркелік көрсеткеніне әкесі ашуланып, өз эмоциясын басқара алмаған. Ұлының бас, бет және іш аймағына бірқатар соққылар жасаған. Бала есінен танып, қылмыс орнында ашық ми жарақатының салдарынан қан кетіп қайтыс болған. Келесі күні әкесі қылмысты жасыру мақсатында ұлының мәйітін бос жерге жерлеген, - деп хабарлады Ақтөбе облысының қылмыстық істер жөніндегі мамандандырылған ауданаралық сотының баспасөз қызметі.
Сотталушы өз кінәсін мойындамай, ұлының бірнеше рет құлағанын мәлімдеді. Қайтыс болған ұлын көргенде, ер адам абдырап қалғанын жеткізді. Не болғанын ешкімге айтпай, тереңдігі 2 метрден асатын шұңқыр қазу үшін экскаватор жалдаған. Баланы жерлеген соң Артур Ахунов бірнеше күннен кейін полицияға ұлы жоғалып кеткені туралы хабарлаған.
- Қылмыстық істі қарау кезінде заңнама талаптарын өрескел бұзғаны, жауапты лауазымды тұлғалардың өздерінің функционалдық міндеттеріне немқұрайлы қарағаны үшін сот Ақтөбе облысының полиция департаменті мен білім басқармасының атына жеке қаулы шығарды. Сот үкімі заңды күшіне енген жоқ, - деп қорытындылады сот.