RUS
Бүгін таңертең сағат 09:06 шамасында полицияға Петропавл қаласы Жамбыл көшесі, 286 мекенжайындағы үйдің ауласында белгісіз ер адам мен осы тұрғын үйдің тұрғындары арасында жанжал болғаны туралы хабарлама түскен.
Оқиға орнына келген полиция қызметкерлері заңды талаптарына бағынбауға тырысқан 36 жастағы ер адамды қолға түсірді.
Медициналық куәландырудың нәтижесінде, ер адам ұсталған кезінде алкогольдік масаң күйде болған. Әрі өзімен бірге жеке куәлігі болмаған.
— Ұсталған ер адамға қатысты ҚР Әкімшілік құқық бұзушылық туралы кодексінің 440-бабының 1-бөлігі "Алкогольдік ішімдіктерді iшу немесе қоғамдық орындарға масаң күйде келу" бойынша, 492-бабы "Қазақстан Республикасында тiркеусiз не жеке басты куәландыратын құжаттарсыз тұру" бойынша, 667-бабы "Құқық қорғау органы қызметкерінің заңды өкіміне немесе талабына бағынбау" бойынша әкімшілік іс қозғалды, - дейді полиция өкілдері.