RUS
Солтүстік Қазақстан облысы Полиция департаменті баспасөз қызметінің мәліметінше, ұйымдасқан қылмысқа қарсы күрес басқармасына «Жас өркен» шағынауданындағы гараждардың бірінде акцизсіз алкоголь өнімі сақталуы мүмкін деген жедел ақпарат түскен. Шұғыл шараларды жүргізу барысында полицейлер облыстың 19 жастағы тұрғынын ұстады. Жігіттің гаражында акциздік маркасы жоқ 0,5 литрлік мыңдаған бөтелке табылды. Олардың ішінде арақ болған. Тәркіленген өнімнің жалпы көлемі 500 литр.
Бұл факт Петропавл қаласы полиция басқармасының ақпаратты есепке алу кітабына тіркелді. Учаскелік полиция инспекторлары ҚР Әкімшілік құқық бұзушылық туралы кодекстің 463-бабының 1-бөлігі бойынша («кәсіпкерлік немесе өзге де қызметпен айналысу, сондай-ақ тиісті тіркеусіз, рұқсатсыз немесе хабарлама жібермей іс-әрекеттерді (операцияларды) жүзеге асыру») бойынша әкімшілік материал жинады. Қазіргі уақытта алынған сұйықтық сараптамаға жіберілді. Гараж иесінің айтуынша, ол алкогольді одан әрі сату үшін сақтаған.
«Жыл басынан бері бөлімше қызметкерлері заңсыз айналымнан 5144 литр заңсыз алкоголь өнімін алды. Бұл бағытта жұмыс жалғасын табады», - деді СҚО ПД ұйымдасқан қылмысқа қарсы күрес басқармасы бастығының міндетін атқарушы Рахат Нұрахметов.