RUS
Қоғамдағы және әлеуметтегі өзекті мәселенің бірегейі - тіл болып тұр. Тілі орыстанған балаларымыз көп. Оған не себеп?
Көп ата-ана ұл-қызының қазақ тілінде сөйлеуге құлықсыздығын телефон мен әлеуметтік желінің кесірі деп көреді. Бірақ баланың қандай контентті тұтынып, қандай желі қолданып жатқанын ата-ана қадағалауы керек. Десе де, қазір бала тәрбиесін телефонға жүктеген жұмысбасты ата-ана көп.
Аталған мәселеге қатысты Астанадағы №65 мектеп-гимназия директорының орынбасары Майра Мырзахметова былай дейді:
- Шілде айында Астана қаласында өзім істейтін мектепте директордың міндетін уақытша атқарып отырдым. 1-сыныптар бойынша 6 қазақ сыныбы, 6 орыс сыныбы ашылды бізде. Қазақ сыныптарына балаларды көбейту керекпіз, орыс сыныбына бала алуды тоқтатыңдар деген тапсырма келді жоғарыдан. Құжат тапсыруға 10 күн қалғанда қаншама ата-аналар келді орыс сыныбына береміз деп. 80 пайызы өзіміздің қазақтар, - дейді жеке Facebook парақшасында.
Майра Мырзахметованың жазуынша, ата-аналар балаларын өздері орыс сыныбына беруге құлықты екен.
- Түсіндіріп көрдім, "алмаймыз, орыс сыныбына бала алуды тоқтатты" десем де балағаттап, неше түрлі сөздерді айтты. Есігімді теуіп қорқытып кеткендер қаншама. Бұл жағдай жүректі ауыртты... Балам сөйлей алмайды, балабақшада үйренбеді деп ақталады көбісі. Сіздер ше десем, біздің уақытымыз жоқ баламен сөйлесуге, телефоннан үйреніп алған дегенде не айтарымды білмедім...- деп қынжылды маман.