RUS
«Интернет желісінде алаяқтар ірі компания бухгалтерлерінің компьютеріне кіру үшін хакерлік бағдарламаларды жиі қолданады. Мысалы, Қарағанды қаласында ірі ұйымның банк шотынан 60 млн теңге ұрлауға қатысы бар облыстың 20 жастағы тұрғыны ұсталды. Ол ұрлық жасау үшін қауіпті бағдарлама қолданған. Оның қатысушыларын, сондай-ақ олар жасаған басқа да қылмыстарды анықтау шаралары қабылданды», - деп оқиғаның мән-жайына тоқталды Рүстем Дүйсетаев.
Сондай-ақ алаяқтық жолмен алынған ақшаны қолма-қол қаржыға айырбастап, қылмыскерлерге көмектескен Ресей азаматы ұсталған.
«Ақмола облысының полиция департаментінің қызметкерлері Ресей Федерациясының азаматын ұстады. Ол банк қызметкерлерінің атынан алаяқтық жасаған кезде азаматтардан ұрланған ақшаны қолма-қол ақшаға айналдыруға көмектескен. Аталған күдіктінің 25 қылмыс жасағаны әшкереленді, жалпы шығын 100 миллион теңгеден асады», - деді Рүстем Дүйсетаев.
Сондай-ақ, жыл басынан бері елімізде 12 мыңнан астам интернет-алаяқтық қылмысы тіркелген.
«Бүгінде интернетсіз өмірді елестету мүмкін емес. Онлайн қызметтер өмірдің барлық салаларында кеңінен қолданысқа енді. Өкінішке орай, мұны қылмыскерлер де белсенді қолданады, әсіресе интернет-алаяқтығын жасауға пайдаланады. Жыл басынан бері елімізде осындай 12 мыңнан астам қылмыс тіркелді. Оларды ашудың күрделілігі трансшекаралық сипатқа байланысты. Халықты алдап, ақшасын қағып жүрген алаяқтар көбіне елдің басқа аймағында немесе шетелде болады. Осыған байланысты, аталған қылмыс түрлерінің алдын алу және ашу үшін биыл 16-18 тамыз аралығында республика аумағында «Hi-tech» жедел-алдын алу іс-шарасы өткізілді. Оның үшінші күнінде 200 қылмыс тіркелді. Сондай-ақ бұрын жасалған 339 алаяқтық анықталды», - деді Рүстем Дүйсетаев.
Спикер мәлімдегендей, алаяқтық қылмыстар көбіне онлайн сауда кезінде жасалады.
«Әдетте алаяқтар құрбандарына арзан баға ұсынады немесе тауарды тез жеткіземіз деп алдайды. Сатып алушылардан ішінара немесе толық алдын-ала төлемді әдетте үшінші тарап шоттарына салуды сұрайды. Мәселен, Алматы қаласында Instagram әлеуметтік желісінде Iphone маркалы телефондарды сату туралы хабарландырулар орналастырған 2 алаяқ ұсталды. Аталған күдіктілер алаяқтықтың 30 фактісін жасау барысында әшкереленді, жалпы шығын 15 миллион теңгеден асты», - деп мәлім етті Рүстем Дүйсетаев.