Маңғыстаудағы сарбаздың өлімі: Сотқа дейінгі тергеу жүріп жатыр

Бұл туралы Ақтау гарнизонының бас әскери прокуроры Ерлан Құтқожа айтты.

Ерлан Құтқожа бұл іс бас әскери прокуратура мен Ақтау гарнизоны прокуратурасының ерекше бақылауында екенін айтты.

“Қазіргі таңда сотқа дейінгі тергеп-тексеру амалдары жүргізілуде. Өлімнің нақты себебін анықтау үшін кеше марқұмның денесіне сараптама жүргізілді. Сараптаманың қорытындысын күтіп отырмыз. Егер себебі табылса, олардың шығу тегі мен құрамын анықтау үшін қосымша сараптама жүргізіледі", – деді Ерлан Құтқожа.

Ақтау гарнизонының бас әскери прокуроры жарылыс оқу-жаттығу полигонында емес, әскерилердің тұрмыстық қоқыстарды шығарып жатқан арғы жағында болғанын түсіндірді.

"Жарылыс салдарынан тағы бір келісімшарт бойынша әскери қызметші, 2000 жылы туған сержант жараланды. Ол басынан жарақат алды. Қазір ол ауруханада жатыр, жағдайы қанағаттанарлық, өміріне қауіп төніп тұрған жоқ. Әскери қызметкердің күйзеліске ұшырағанына байланысты әлі сұхбат алу мүмкін болмады. Тергеу қорытындысы бойынша кінәлілер жауапқа тартылады", – деді Құтқожа. 

Естеріңізге сала кетейік, 30 қыркүйекте Маңғыстауда әскер қатарына шақырылған азамат қаза тапты.