«Сүйіп амандасу қаншалықты дұрыс?»: журналист қоғамдағы әдеп мәселесін көтерді
Журналистің пікірінше, еркіндік адамның қоғамдық ортадағы әдеп нормаларын ұмытуына себеп болмауы керек.
SMARTNEWS.KZ басылымының хабарлауынша, журналист Дәурен Сейітжанұлы Facebook парақшасында қоғамдағы әдеп мәселесіне қатысты пікір білдіріп, қоғамдық орындардағы ерлер мен әйелдердің қарым-қатынасына назар аударды.
Журналист өз жазбасын Мемлекет басшысының құқықтық мәдениет туралы айтқан сөзімен байланыстырып, заңға құрмет адамның күнделікті жүріс-тұрысынан, әдебі мен тәртібінен көрінуі керек деген ой айтты.
Оның сөзінше, соңғы уақытта қоғамдық ортада ерлер мен әйелдердің бір-бірімен шектен тыс жақын амандасып жүргенін жиі байқауға болады. Дәурен Сейітжанұлы мұндай әрекеттердің қоғамдық әдеп тұрғысынан қаншалықты орынды екенін сұрақ етіп қойды.
Журналист бала кезіндегі Қазалы мен Арал ауданындағы амандасу дәстүрін де еске алды. Оның айтуынша, ол жерде әйелдермен қол алыспай, «сәлем бердік» деп амандасу қалыптасқан. Дәурен Сейітжанұлы бұл дәстүрді үлкендерден көріп, сол арқылы әдеп пен ізетті үйренгенін атап өтті.
Ол ер азаматтың қыз балаға сыпайылық танытуы дұрыс екенін жоққа шығармайды. Алайда қоғамдық орындарда, жұмыс барысында немесе түрлі басқосуларда бір-бірімен тым жақын араласудың қажеті жоқ деп есептейді.
«Қоғамдық жерде, жұмыста, отырыстарда бас салып құшақтасып амандасудың, шектен тыс қалжыңдасудың қажеті қанша?!» – деп жазды журналист.
Оның пікірінше, мұндай жағдайда өзгенің жеке шекарасын және отбасылық жағдайын да ескерген жөн. Себебі адамның жақын қарым-қатынасы оның айналасындағы адамдарға әрдайым бірдей қолайлы болмауы мүмкін.
Дәурен Сейітжанұлы қоғамда еркіндік пен әдептің ара-жігін ажырата білу қажет екенін айтып, көпшілік ортада сыйластық пен шекараны сақтауға шақырды.
Журналист сөз соңында қазақтың «Сәлем – сөздің анасы» деген нақылын еске алып, ең бастысы адамдардың бір-біріне деген құрметі жоғалмауы керек деген ойын жеткізді.