RUS
Smart News басылымының хабарлауынша, ауыр атлет шебері Илья Ильин қазақша үйреніп жүргенін айтты.
"Қайырлы кеш баршаңызға, достар! Тағы да қазақ тілінен қате жібердім. Мен оны кесіп тастауды ойладым, бірақ олай болмады, өйткені мен үйреніп жатырмын және қателескен дұрыс!
Ата-аналардың үйіне қонаққа бару қандай керемет! Бізді тәрбиелеп өсіргені үшін, бар болғаны үшін аналарымыз бен әкелерімізге мың да бір рахмет!" - деп жазды спортшы.
Сондай-ақ спортшыға жақын күндері ота жасалған. Оның айтуынша, тізесіндегі мениск шеміршегі жыртылып кеткен. Атлет жариялаған өз видеосында отадан кейін ата-анасына келгенін айтты.
"Қайырлы күн, достар. Біз ата-анамыздың үйіндеміз. Денсаулығыма байланысты алған төрт күндік демалысым осымен аяқталды", - деді спортшы жаңадан жариялаған видеосында.
Спортшының жанкүйер оқырмандары оған қолдау білдірді.
"Илья нағыз Қызылорданың жігіті ғой, қазақ болып кеткен. Ұят деген тәрбиесіне сіңіп кеткен. Тезірек жазылып кет. Аман бол. Біз сенімен мақтанамыз", - деп жылы лебізін білдірді оқырмандардың бірі.