RUS
Үндістанның Қазақстандағы елшісі Доктор Т.В. Нагендра Прасад астаналық тілшілермен кездесуінде екі ел қарым-қатынасының маңызды нәтижелері туралы айтып берді, бұл туралы Kazinform хабарлап отыр.
Елшінің айтуынша, Үндістан мен Қазақстан 2000 жылдан астам уақытқа созылған ежелгі тарихи қатынастармен байланысты. Екі ел тауарлармен, идеялармен және мәдени тұрғыда тұрақты алмасып келеді.
«Үндістан Қазақстанның тәуелсіздігін мойындаған алғашқы елдердің бірі болды. Дипломатиялық қатынастар 1992 жылы 22 ақпанда құрылған. Содан бері өткізілген жоғары деңгейдегі сапарлар қос мемлекет қарым-қатынасына жаңа серпін берді. Қазақстан – Үндістанның Орталық Азиядағы ең ірі сауда және инвестициялық серіктесі. Біздің екі жақты тауар айналымымыз үш жыл қатарынан 2 миллиард доллардан асады. Бізде сауданы кеңейтуге үлкен мүмкіндік бар. Перспективалы секторлар – пайдалы қазбалар өндіру, фармацевтика, жаңартылатын энергия көздері, технологиялар, өндіріс және басқалары, оларға ерекше назар аудару қажет, өйткені Үндістанның кең ресурстары мен тәжірибесі бар», - дейді елші.
Сондай-ақ, қорғаныс саласындағы ынтымақтастық – Қазақстан мен Үндістанның маңызды негізі. 2018 жылдан бастап Үндістан мен Қазақстанның әскери қызметшілері Ливандағы БҰҰ туы астында бірлесіп қызмет атқарады. Алматыда «Терроризмге қарсы ілімдер» тақырыбында өткен «КазИнд-2023» бірлескен әскери жаттығуларында Үндістан қарулы күштері қазақстандық әріптестерімен тәжірибе алмасқан.
«Үндістан мен Қазақстанның мәдени байланысы йога, үнді фильмдері, би және музыка арқылы нығайып келеді. Астанадағы Свами Вивекананда мәдени орталығы әртүрлі мәдени іс-шаралар, соның ішінде йога, би және музыка сабақтарын өткізеді. БҰҰ Халықаралық йога күнін жариялаған сәттен бері бүкіл әлемде осы ежелгі үнді қазынасына қызығушылық артты. Биыл Халықаралық йога күні бүкіл Қазақстан бойынша 21 қалада аталып өтті. Йога сабақтары мәдени орталықта және елшілікте тұрақты түрде өткізіледі», - деп толықтырды Доктор Т.В. Нагендра Прасад.
Білім беру саласында қазақстандық жастар Үндістанның техникалық және экономикалық ынтымақтастық бағдарламасы (ITEC) және Үндістанның мәдени байланыстар кеңесінің стипендиясына үміткер бола алады. ITEC бағдарламасы шеңберінде Үндістан Қазақстанға ауыл шаруашылығы, банк ісі, құқықтану, жасанды интеллект, ақпараттық технологиялар, инженерия, қала құрылысы, менеджмент, йога, ағылшын тілін меңгеру және т. б. сияқты түрлі мамандандырылған салаларда әлеуетті арттыруға көмектеседі және 1992 жылдан бері Қазақстанның 1400-ден астам азаматы ITEС бағдарламасымен білім алған.
Ал Үндістанның мәдени байланыстар кеңесі (ICCR) стипендиялық бағдарламасында Қазақстаннан келген студенттерге түрлі көркемдік пәндер бойынша тегін оқу ұсынылады.
«Қазіргі уақытта Қазақстанда 9500-ден астам үнді студенттері медицинаны оқып жатыр. Үндістан Ақпараттық технологиялар саласындағы шеберлігімен танымал. Қазақстандық студенттер "Үндістандағы оқу" бағдарламасы бойынша инженерлік және ақпараттық технологияларды оқыту үшін де келе алады. 2015 жылы Үндістан академиялық және ғылыми-зерттеу бағдарламаларын ынталандыру үшін Қазақстанға Param Bilim суперкомпьютерін берді», - дейді дипломат.
Туризм бойынша Үндістан жылдың кез келген уақытында және тарих, мәдениет, таулар мен теңіздер, сауықтырудан бастап, медициналық сауықтыруға дейінгі барлық қызығушылықтарға сәйкес қызметтер ұсынады.
«Гоа және Тәж-Махал сияқты орындар қазақтар арасында өте танымал. Үндістан сапасы мен қолжетімдігіне байланысты медициналық және сауықтыру туризмі үшін өте танымал бағыт болып отыр. Нью-Дели мен Алматы арасында аптасына 11 рейс қатынайды. Бұл екі ел арасындағы туризмнің дамуына серпін берді. Біздің электронды визаны үйден шықпай-ақ алу оңай және ол Қазақстан азаматтары үшін ұзартылды», - деп түсіндірді Доктор Т.В. Нагендра Прасад.
Сонымен бірге, дипломат жақында өткен Үндістанның ең төменгі бағадағы айға бару миссиясы – «Чандраян» туралы айтып берді.
«Қазақстан да ғарышқа ұшуымен танымал және Үндістан технологиясы мен тәжірибесін бөлісуге дайын. Қазақстандықтар цифрлық төлемдерге бейімделді және Үндістан бұл секторда көшбасшы – әлемдік цифрлық төлемдердің 60% астамы Үндістанда, оның Universal Payment Interface (UPI) – әмбебап төлем интерфейсі платформасында жүргізіледі. Үндістан бұл технологияны барлық достас елдерге ұсынады және Қазақстан осы технологияның көмегімен цифрлық транзакциялар деңгейін арттыра алады», - деді Үндістан елшісі.