RUS
SMARTNEWS.KZ басылымының хабарлауынша, Түркияның Ыстанбұл қаласында халықаралық жекеменшік мектептің директоры қызметін атқарған Қазақстан азаматы өз әріптесін зорламақ болды деген айыппен сотқа тартылмақ. Бұл туралы жергілікті ақпарат құралдары TGRTHaber жазды.
Оқиға 2024 жылдың 11 қарашасында Ыстанбұлдың Сарыер ауданында тіркелген. Айыпталып отырған – 42 жастағы Қазақстан азаматы. Ол беделді халықаралық мектептің директоры қызметін атқарған. Ал жәбірленуші – сол оқу орнында дене шынықтыру пәнінен сабақ беретін 39 жастағы мұғалім.
Жәбірленушінің сөзінше, сол күні таңертең директор құжаттарды бірге қарап шығуды сылтауратып оның кабинетіне кірген. Әуелде компьютердегі қағаздарды қарап шыққан соң, қасына отырып сөзбен мазалай бастаған. Әйел жауап қатпаған кезде, ер адам денесіне қол жүгірткен.
«Алдымен кеудемді бір қолымен басты. Қарсылық білдіріп, алыстай бергенімде екінші рет қатты қысып жіберді. Осы кезде оны итеріп жібермек болдым, бірақ бір сәтте көзім қарауытып, есімнен танып қалдым», – делінген жәбірленушінің прокуратураға жазған шағымында.
Жәбірленуші оқиғадан кейін ауруханаға жеткізілген. Сот-медициналық сараптама оның денесінде физикалық зорлық белгілері барын растаған – кеуде тұсында қызару мен қысым іздері анықталған.
Барлық деректер – дәрігерлік қорытынды, куәгерлердің жауабы мен арыз – Түркия прокуратурасына тапсырылды. Алайда күдікті мектеп директоры өзіне тағылған айыпты мойындамай, жәбірленушіге "қол да тигізген жоқпын" деп ақталуда. Тергеу барысында ол аудармашының көмегіне жүгінген.
Қазіргі уақытта іс бойынша тергеу аяқталып, жақын күндері қазақстандық азамат Ыстанбұл қылмыстық сотының алдында жауап береді.