RUS
SMARTNEWS.KZ басылымының хабарлауынша, Қарағанды облысы Нұра ауданында жалпы кадастрлық құны 4,78 миллиард теңге болатын 2 391 гектар ауыл шаруашылығы жері мемлекет меншігіне қайтарылды. Бұл туралы облыстық прокуратураға сілтеме жасап Kazinform хабарлады.
Тексеру кезінде бұл жер телімінің 2012 жылдан бері пайдаланылмағаны анықталған. Алғашында жер аудан әкімінің өкімімен және Жер қатынастары бөлімімен бекітілген келісім негізінде шаруа қожалығына 20 жылға жалға берілген.
— Прокуратура талдау жүргізіп, пайдаланылмаған жердің кадастрлық құны 4,78 млрд теңге екенін анықтады. Қабылданған шаралардың нәтижесінде жер телімі мемлекет меншігіне қайтарылып, енді ол жосықты жер пайдаланушыларға беріледі, — делінген Қарағанды облысы прокуратурасының хабарламасында.
Аталған факті жер ресурстарын тиімді пайдалануға және жер заңнамасының сақталуын қамтамасыз етуге бағытталған қадағалау шараларының бір бөлігі.