RUS
Оқиға 2022 жылдың 16 қазан күні болған. Биіктен құлаған құрылыс материалы 22 жастағы жігітті басып қалды. Желіде тараған видеодан құрылыс аумағында үш жұмысшының тұрғанын көруге болады. Ал төбеден құлаған ағаш бірінің үстіне түскен. Салдарынан «Тұран 2» шағынауданындағы құрылыс алаңында жұмыс істеп жүрген 22 жастағы жігіт көз жұмды.
Шымкент қаласының қылмыстық істер жөніндегі ауданаралық сотында жұмыс беруші ЖШС басшысына қатысты қылмыстық іс қаралды.
Сотталушы ҚК-нің 277-бабы 2-бөлігімен, яғни құрылыс жұмыстарын жүргізудің қауіпсіздік қағидаларын бұзып, абайсызда адам өліміне әкеп соққан әрекеті бойынша кінәлі деп танылды. Сот үкімімен оған 2 жыл мерзімге бас бостандығынан айыру жазасы тағайындалды.
«Сотталушының жауаптылығы мен жазасын жеңілдететін мән-жайлардың жиынтығын, ауырлататын мән-жайлардың жоқ екенін, жәбірленуші өкілінің кешіргенін, бас бостандығынан айырмайтын жаза тағайындау туралы пікірін, сотталушының бұрын сотты болмағанын және ол жасаған қылмыс орташа санаттағы қылмыстарға жататындығын назарға ала отырып, шартты түрде соттауды тағайындады. Бұдан бөлек, 2 жыл мерзімге құрылыс саласында жұмыс атқаратын ұйымдарда басшылық қызмет атқару құқығынан айыру түріндегі қосымша жаза тағайындалды. Сот үкімі заңды күшіне енген жоқ», - делінген Шымкент қаласының қылмыстық істер жөніндегі ауданаралық сотының баспасөз қызметі ұсынған ақпаратта.