RUS
SMARTNEWS.KZ басылымының хабарлауынша, Түркістандағы этноауыл кешенінде Амал мерекесі аталып өтті. Жиынның шымылдығын қала әкімі аппаратының басшысы Талғат Қыдырбаев ашты. Бұл туралы Түркістан облысы әкімінің баспасөз қызметі жазды.
«Қазақ әрқашан Наурыз мерекесін ерекше атап өткен. Қыстан аман-есен шыққанына шүкірлік етіп, жақсылыққа үміт еткен. Осы орайда, ұлтымыздың мерейін өсіріп, бар болмысымызды айшықтайтын қасиетті – Наурыз мерекесі баршамызға құтты болсын. Ұлыс оң, ақ мол болсын!» – деді аппарат басшысы.
Мазмұнды мейрам қалалық Мәдениет үйі өнерпаздарының көрісу күніне арнайы дайындаған қойылымымен жалғасты. Тұрғындар бір-бірін қыстан аман-есен шығуымен құттықтап, төс қағысты. 70-ке жуық жас қолөнерші өз туындыларынан көрме ұйымдастырып, келушілерге орта арнаулы оқу орындарының студенттері қазақтың ұлттық тағамдарын ұсынды.
Айта кетейік, облыс орталығында Наурыз мейрамы он күн тойланады.