RUS
SMARTNEWS.KZ басылымының хабарлауынша, Демеу Жадыраев Париж олимпиадасының күміс жүлде иегері.
Грек-рим күресінен Ұлттық құрама палуаны (77 кг) Демеу Жадыраев Париж Олимпиадасының ширек финалында Токио Олимпиадасының күміс жүлдегері, әлем чемпионы Ақжол Махмұдовты 3-1 есебімен жықты. Отандасымыз қырғызстандық қарсыласын төрттағаннан көтеріп алып, айналдыра лақтырды.
Ал жартылай финалда Демеу әзербайжан Санан Сүлеймановтан басым түсіп, финалға жолдама алған еді. Сананды кілемнен көтеріп алып, лақтырып, төрт ұпай алды да, одан соң кілемде бір айналдырып, тағы екі ұпай иеленді. Белдесудің екінші бөлігінде Санан есепті теңестіре алған жоқ – 6:1.
Енді жауырыны жер иіскемеген палуанымыз финалда жапон Нао Кусакамен белдесіп, одан жеңіліп қалды.
Десе де Демеу Жадыраев елімізге күміс медаль сыйлады.
Айта кетейік, Демеу Жадыраев 2 қараша 1989 жылы дүниеге келген. Ол Жетісу облысы, Панфилов ауданы, Үшарал ауылдық округінде туған. Грек-рим стиліндегі палуан. Ол 2020 жылғы Токиодағы олимпиадаға қатысқан.
Демеу 2015 жылы 66 келіге дейінгі санаттағы Азия чемпионатының қола жүлдегері. 2016 жылы әскери қызметшілер арасындағы әлем чемпионатының қола жүлдегері атанды. 2017 жылғы әлем чемпионатының 71 келіге дейінгі санаттағы күміс жүлдегері.