RUS
SMARTNEWS.KZ басылымының хабарлауынша, желіде Шымкент қаласының бұрынғы әкімінің ағасы Марат Әйтеновтің бұрынғы жұбайының күштеп көшірілген видеосы жарияланды.
Қазақстандық Дана Атешова Instagram парақшасында үш баласымен бірге үйінен күштеп шығарылып жатқаны туралы видеоролик жариялады. Онда ер адамның әйелді шашынан ұстап, үйінен шығарып жатқанын көруге болады. Экранның бер шетінде бұл Марат Әйтеновтің бұрынғы жұбайы деп айтылады. Сондай-ақ, видеода жылап жатқан балалар үйінен қалай шығарылғанын, олардың біреуінің мұрнынан қан кетіп жатқанын байқауға болады. Оқиға құқық қорғау органдарының қызметкерлері мен жеке сот орындаушыларының алдында болады.
«Ең өкініштісі, полиция мен ер адамдар алдында ол мені тағы да ұрды. Мен: «Полиция! Полиция» деп айқайладым. Ол мені тұншықтырды, шашымнан сүйреді. Бізде заң қайда? Полиция не істеп тұр! Ол менің шашымды жұлды», – деді Дана Атешова.
Бұл оқиғаға Қазақстандағы Бала құқықтары жөніндегі уәкіл Динара Закиева түсініктеме берді.
«Дана Атешова мен оның балаларымен болған жағдайға қатысты. Бұл жағдай бойынша біз қала прокуратурасына хабарластық. Балалардың анасымен байланыстамыз.
Сондай-ақ, Бас прокуратураға кәмелетке толмағандарға қатысты қысымның, қорқытудың жолын кесу және аталған фактілерді жан-жақты қарау жөнінде кешенді шаралар жүргізу бойынша өтініш жолданды», – деді Закиева.
Одан бөлек желіде оқиғаның қалай басталғаны жөнінде бейнежазба тарады. Онда Марат Әйтенов әйелге ұлының атында бизнес-класстағы пәтер барын айтады.
«Бұл сендердің, балалардың пәтері. Өтірік болса, онда үйдің құжаттарын көрейік. Мен өзім жеке, сендерге, Мансұрға (ұлы - ред.) бұл үйді бірнеше рет ұсындым. Мансұр, сенің атыңда Алматыдағы бизнес-класстағы төрт бөлмелі пәтерің бар. Сол өз баспаналарыңда тұрыңдар, қарсы емеспін», – дейді Әйтенов.
Бейнежазбада Дана Әтешованың Әйтеновті балағаттап жатқанын көруге болады.