RUS
SMARTNEWS.KZ басылымының хабарлауынша, Қаратау (Черногория) еліндегі әлемдік чемпионатта боксшыларымыз елімізді жерге қаратпады.
Қаратаудың Будва қаласында бокстан жастар арасында өтіп жатқан IBA Youth World Boxing Championships 2024 әлем чемпионатында үш қазақ бірдей алтын медаль алды.
Алдымен Төрехан Сабырхан (67 келі) бокстан жастар арасындағы 2024 жылғы әлем чемпионатының финалында кубалық Дэвид Мануэль Эспиноса Сантоямен жұдырықтасты. Жекпе-жекте қазақстандық боксшы қарсыласынан 4:1 есебімен басым түсіп, алғашқы алтынды қағып түсіріп, чемпион атанды.
Одан соң ел құрамасынан Санжарәлі Бегалиев (75 келі) өзбекстандық Джафарбек Шахбазовпен қолғап түйістірді. Жекпе-жек барысында 5:0 ұпай жинап, қарсыласын айқын басымдықпен тізе бүктірді.
Одан соң Аружан Зейноллаева (81 келі) тағы бір өзбекстандық Рухшона Парпиевамен шаршы алаңға шығып, төрешілердің бірауыздан берген 5:0 есебі арқылы жеңіске жетті.
Боксшыларымыз алтын жүлдесі үшін ұйымдастырушылар тарапынан 8000 доллар (3,9 млн теңге) сыйақы алады.
Айта кетейік, әзірге Қазақстан қоржынында 10 қола, 3 алтын жүлде бар. Ендігі үміт финалда өнер көрсететін боксшыларда. Олар:
50 келі салмақта әйелдер арасында:
Елянур Тұрғанова (Қазақстан) – Карлаг Пике (Ирландия)
66 келі салмақта әйелдер арасында:
Ұлдана Таубай (Қазақстан) – Кила Дойле (Ирландия)
51 келі салмақта ерлер арасында:
Бексұлтан Боранбек (Қазақстан) – Муневар Морено Джастин (Колумбия)
71 келі салмақта ерлер арасында:
Өнер Сейілхан (Қазақстан) – Алексей Гуков (Ресей).