RUS
М. Алматы қаласы білім басқармасының мемлекеттік сатып алу жөніндегі бас маманы бола тұра, Н-дан пара алу мақсатында оның «Б» ЖШС және «А» ЖШС компанияларын ерекше, жетім және ата-ана қамқорлығынсыз қалған балаларға арналған жазғы демалысты ұйымдастыру қызметін мемлекеттік сатып алу конкурсының жеңімпазы деп таныған.
«2023 жылдың жазында Н. „Ж“ МК-ның 50 баласын өзінің жеке мектебіне орналастырған. Сол күні ол балалар лагерін ұйымдастыру сылтауымен „Д“ фитнес-орталығы бар монша кешеніне 300 баланы орналастырған. Балалардың ата-анасы және „Ж“ МК қызметкерлері жеке мектеп пен фитнес-сауықтыру кешені бар монша кешенінің балалардың демалыс орнына айналғанын біліп, балаларын үйіне алып кеткен. М. және Н-ның қылмыстық әрекетінен балалардың және ерекше күтімді қажет ететін балалардың жазғы демалысы бұзылып, балалар қолайсыз жағдайда бейтаныс адамдардың арасында қалған», — деп хабарлады Алматы қалалық соты таратқан хабарламада.
Сотталушы М. кінәсін мойындамай, соттан оны ақтауды сұрады. Сотталушы Н. өз кінәсін толық мойындап, соттан бас бостандығынан айырмайтын жаза тағайындауды сұрады.
Прокурор сотталушы М-ны — 7 жылға, Н-ны — 5 жылға бас бостандығынан айыруды сұрады.
«Сот үкімімен М. өзінің қызмет бабын пайдаланып, аса ірі мөлшерде пара алуға әрекеттенгені үшін кінәлі деп танылып, оған 6 жыл мерзімге бас бостандығынан айыру жазасы тағайындалды. Ол бұдан былай мемлекеттік қызмет атқара алмайды. Н. аса ірі мөлшерде алдау және сенімге қиянат жасау арқылы алаяқтық әрекетін жасағаны үшін кінәлі деп танылып, 5 жыл мерзімге бас бостандығынан айырылды» деп хабарлады Алматы қалалық сотының баспасөз қызметі.
Сотталушылардың кінәсі іс бойынша жиналған дәлелдемелермен, сотталушы Н-ның мойындауымен, куәлардың айғақтарымен, мамандардың қорытындысымен және жасырын тергеу әрекетінің нәтижесімен дәлелденді.
Жауапкершілікті жеңілдететін мән-жай ретінде М. мен Н-ның бірінші рет сотталып отырғаны, сотталушы M-ның асырауында кәмелетке толмаған екі кішкентай баласы болуы, Н-ның жасаған қылмысына шын жүректен өкінуі, кінәсін мойындауы болды.
Жауапкершілікті ауырлататын мән-жай жоқ.
Үкім заңды күшіне енген жоқ.