Бұл туралы «Отбасы банк» АҚ басқарма төрағасының орынбасары Нұрлан Ақшанов айтты.
Биыл наурыздан бастап «Отбасы банкі» «Отау» бағдарламасын іске қосты. Қарыздың ең жоғары сомасы Астана және Алматы қалалары үшін – 30 млн теңге, қалған өңірлер үшін – 18 млн теңге. 18 сәуірде бағдарламаның шарттарына толық сәйкес келетін 18 мыңнан аса өтінім қабылданды. Оның ішінде мегаполистер мен облыс орталықтарынан 16 мыңнан аса өтінім (87%) қабылданды, - деді Нұрлан Ақшанов Үкімет отырысында.
Басқарма басшысы орынбасарының айтуынша, қарыз бойынша жылдық сыйақы мөлшерлемесі – 9%, бастапқы жарна – 20%, несие мерзімі – 19 жыл.
Жаңа тұрғын үй бағдарламасына Қазақстан азаматтары немесе қандас мәртебесі бар этникалық қазақтар қатыса алады. Ол үшін «Отбасы банкінде» кемі 18 ай жиналған 1 млн теңге жинақ болуы шарт, баспана болмауға тиіс немесе соңғы 5 жылда тұрғын үй операциясы жасалмағаны жөн және соңғы 6 айда ресми табысы болуы керек.
Астана, Алматы, Шымкент қалаларында және облыс орталықтарында тек бастапқы тұрғын үй сатып алуға рұқсат етіледі. Қалған өңірлерде қайталама нарықтағы тұрғын үй сатып алуға болады, - деді төрағаның орынбасары.
Сондай-ақ Үкімет отырысында 1 мамырдан бастап «Наурыз» жаңа тұрғын үй бағдарламасының іске қосылатыны хабарланды. Халықтың әлеуметтік осал топтары үшін жылдық сыйақы мөлшерлемесі – 7%, бағдарламаның басқа қатысушылары үшін – 9%, бастапқы жарна – 20%, қарыз мерзімі – 19 жыл.