RUS
SMARTNEWS.KZ басылымының хабарлауынша, желіде Астанадағы автобуста жолаушылардың бірі қоғамдық тәртіпті бұзып, оған ескерту айтқан азаматқа газ шашқаны түсірілген видео пайда болды. Оқиғаға қатысты тәртіп сақшылары пікір білдірді.
Әкімдік ақпараты бойынша, 1 мамырда №21 бағытындағы автобус Ailand отбасылық демалыс орталығы маңында орналасқан аялдамада жолаушылардың бірі автобус қызметкеріне жол ақысы төленгені туралы чек көрсетуден бас тартып, қоғамдық тәртіпті бұзған.
Өзге автобус жолаушылары ер адамға ескерту жасаған. Алайда ер адам жолаушылардың біріне газ шашты.
Полиция департаменті қызметкерлерінің айтуынша, ер адамға қатысты әкімшілік хаттама толтырылып, 73 840 теңге көлемінде айыппұл салынды.
Әкімдік өкілдері қоғамдық көлікте жол жүру ақысын уақтылы төлеу, төлемді тексеруге көрсету, сондай-ақ өзге жолаушыларды құрметтеу керегін айтты.