RUS
Бұл туралы СІМ ресми өкілі Айбек Смадияров айтты.
СІМ ресми өкілінің айтуынша, биыл 6-10 мамыр аралығында Сыртқы істер министрінің бірінші орынбасары Қайрат Омаров Уругвай мен Бразилияға барады.
«Уругвайға сапар аясында СІМ-аралық саяси консультациялардың бірінші раундын өткізу, Монтевидеода Қазақстанның құрметті консулдығын ашу және Астана мен Монтевидео арасындағы саяси, сауда-экономикалық және гуманитарлық ынтымақтастықты кеңейту үшін Уругвай парламентінің сенаты мен өкілдер палатасының депутаттарымен кездесу жоспарланып отыр», - деді Айбек Смадияров СІМ-де өткен баспасөз мәслихатында.
Сапар аясында Сыртқы істер министрінің бірінші орынбасары Уругвайдың кәсіпкерлерімен де кездеседі. Одан бөлек, Қайрат Омаров Бразилияда да бірнеше кездесу өткізеді.
Бразилияда СІМ-аралық саяси консультациялардың алтыншы раунды, сенаторлармен кездесу, Бразилия мемлекеттік ауылшаруашылық зерттеулер корпорациясының (Embrapa), Бразилияның халықаралық даму агенттігінің (ABC), сондай-ақ Ұлттық өнеркәсіп конфедерациясының (CNI) басшылығымен кездесу жоспарланып отыр, - деді СІМ ресми өкілі.
Сапар қорытындысы бойынша саяси және сауда-инвестициялық ынтымақтастықты арттыруға, халықаралық ұйымдар шеңберіндегі өзара іс-қимылды жандандыруға бағытталған өңір елдерімен жаңа уағдаластыққа қол жеткізу жоспарланып отыр.