RUS
Бұл жайында Сенат депутаттарының сауалына Премьер-Министр Олжас Бектеновтің жауабында айтылған.
«Үкіметтің 2023 жылғы 28 наурыздағы қаулысымен құрылған технологиялық базаның тиімділігін арттыру, өзін-өзі қамтамасыз ететін ғарыш саласын қалыптастыру, халықаралық кооперация сияқты негізгі тәсілдерді көздейтін Ғарыш саласын дамытудың 2023-2029 жылдарға арналған тұжырымдамасы бекітілді. Саланы дамыту жөніндегі стратегиялық міндеттерді Аэроғарыш комитеті орындайды. Оған қажетті реттеу, іске асыру және бақылау функциялары берілген. Ғарыш саласын дамыту жөніндегі жұмыстың негізгі бағыты – мемлекеттік тапсырмалар арқылы республикалық бюджеттен қаржыландырылатын маңызды және капиталды қажет ететін жобаларды іске асыру. Ғарыш саласын қаржыландырудың жаңа тәсілдері ретінде инвестициялық қор ашу мүмкіндігі талқылануда. Алайда бұл мәселе егжей-тегжейлі зерттеуді қажет етеді», - деді Үкімет басшысы жауабында.
Олжас Бектеновтің атап өтуінше, ғарыш саласындағы негізгі жобаларды іске асыру Үкімет пен уәкілетті органның тұрақты бақылауында тұр.
«Мәселен, «Ұлттық ғарыштық зерттеулер және технологиялар орталығы» АҚ ғарыштық зымыран кешенін құру үшін технологияларды әзірлеу бойынша зерттеулерді жалғастырып жатыр. Сербия, Қытай және Үндістан мамандарын тарту бойынша жұмыстар жүргізілуде. Технологиялар трансферті және қазақстандық мамандар үшін тағылымдамаларды ұйымдастыру мәселелері талқыланып жатыр. 2023-2024 жылдарға ғылыми бағдарламаны іске асыруға 908,8 млн теңге бөлінді. 2025-2027 жылдарға тағы 2,8 млрд теңгеге бюджеттік өтінім берілді», - деді Премьер-Министр.